"« Low cost » pels passatgièrs e « high cost » pels contribuables"

Dempuèi lo mes passat, los responsables de la companhia aeriana Ryanair fan pression sus las collectivitats per qu’augmenten las subvencions autrejadas pel manten de las rotacions a destinacion de Granda Bretanha, Irlanda, Belgica o Païses basses. Darrièr exemple en data : l’aeropòrt de Pau-Pirenèus.
Aquel afar arriba pas al bon moment, que coneis ja una baissa de frequentacion pro fòrta en comparason amb los autres aeropòrts d’Aquitània o de Peitau-Charenta. Totes los autres an agut una baissa de frequentacion significativa (entre –1,6 % e 6,8 %) mentre que los aeropòrts de Pau e de La Rochela an conegut una baissa de frequentacion pro fòrta (respectivament -15,7 % e
-21,4 %). Per Pau, Ryanair reclama 1,4 milions d’euros sus dos ans per servar las linhas a destinacion de Londres-Stansted, de Brussèlas-Charleroi e per dobrir una linha a destinacion de

l’aeropòrt de Paris-Beauvais. La capitala picarda es lo primièr punt d’implantacion de Ryanair en França. La CCI de Pau pagariá 600 000 euros per an, l’aeropòrt 150 000, la comunitat d’aglomeracion de Pau 400 000, la comunitat de comunas de Lac, 200 000 euros e fin-finala lo Conselh general de Pirenèus Atlantics pagariá 100 000 euros.
S’obteniá pas aquela moneda de la part dels partenaris institucionals bearneses, la companhia irlandesa poiriá transportar sos avions dins l’aeropòrt vesin de Tarba.

La contestacion de las LGVs s’amplifica

Après las manifestacions contra la LGV en Provença, es de l’autre costat del país d’Òc e en País Basc que la contestacion comença de se far ausir.
Las associacions bascas mobilizan dempuèi longtemps per dire non a la creacion de linhas novèlas e ja una manifestacion

al mes d’octobre aviá amassat mai de 10 000 personas a Baiona per demandar l’abandon del projècte d’una linha que traucariá lo País Basc Nòrd. Dempuèi la sensibilizacion s’es faita mai al nòrd en territòri gascon, amb la publicacion d’un traçat que mena de Bordèu al Mont-de-Marsan e que se’n va puèi cap a Baiona e de l’autra part cap a Pau. I a tanben la creacion d’una linha novèla entre Bordèu e Tolosa que fa reagir de monde en Gironda e en Òut-e Garona. Pauc a pauc d’associacions se crèan sus tota la zòna ont preveson de far passar aquela LGV. Es donc pas estonnant que dissabte passat de monde venguts de tota la Gasconha se retrobèsson a Hendàia per manifestar.
Amb una participacion a l’entorn de 20 000 manifestants es clar que lo tèma serà central dins la campanha electorala que comença.