"Fan mièlhs conéisser la cultura per mièlhs ensenhar la lenga"

Los efectius creisson. Lo Rector de l’acadèmia de Tolosa, Olivier Dugrip, faguèt part de las primièras resultas de la politica d’espandiment de l’ensenhament bilingüe en Miègjorn-Pirenèus a la sortida de l’acamp del Conselh Academic per l’Ensenhament de l’Occitan (CAEOC). Segon las chifras qu’avança, foguèron 50 580 escolans (primari e segondari mesclats) per l’annada escolara 2009-2010, siá un creis de 4 801 escolans rapòrt a l’annada passada. Al primari, l’iniciacion e la sensibilizacion recampan la majoritat dels efectius amb 36 290 escolans contra 1 897 escolans en bilingüe a paritat orària e 669 en ensenhament immersiu. Al segondari, collègis e licèus, publics e privats, recampan 11 724 escolans al total. A la dintrada de 2010, son sièis novèlas escòlas publicas que dobriràn un cursus bilingüe francés-occitan. Farà un total de quaranta pòls bilingües dins l’acadèmia de Tolosa.
Lo Rector insistís tanben sul fait que lo ministèri « contribuís a la valorizacion de l’ensenhament de las lengas regionalas al collègi ». A indicat que lo novèl licèu « confirma las possibilitats d’ense-nhament obligatòri e facultatiu » de l’occitan. Olivier Dugrip apond enfin que los masters de

mestièrs de l’ensenhament prepausats per l’IUFM e l’Universitat del Miralh intègran una preparacion al concors especific del CRPE e del CAPES Occitan-Lenga d’Òc. Lo nombre de pòstes dobèrts al CRPE passarà de uèit a onze pòstes en rason de besonhs que creissson. D’accions d’informacion a las familhas son estadas menadas amb lo sosten de las collectivitats territorialas. Lo Rectorat assegura que d’autras serián en preparacion per la sason venenta.

Gironda finançarà la LGV

Los elegits an parlat. Philippe Madrelle, president del Conselh General de Gironda, faguèt votar la participacion del departament a la bastison del tròç Tours-Bordèu. La convencion de finançament de la linha a granda vitèssa foguèt aprovada. Lo collectiu vigilància LGV, collectiu d’associacions girondinas opausadas al projècte de LGV dins son ensemble, contestèt primièr lo protocòl causit per aquel vòte. Los associatius creson pas a las perspectivas d’emplec e de desvolopament economic qu’avançan los partesans de la LGV
Los conselhièrs generals s’expriguèron primièr sus de percentatges e d’estimacions de còstes. Lor foguèt tanben demandat de far del president una mena d’interlocutor unic sus aquel dossièr. Lo

tresen punt que fa polemica es una clausula de confidencialitat impausada als elegits, que son pas autorizats a comentar aquela decision. Lo grop comunista s’opausèt a aquel protocòl atal coma un elegit UMP. Tres elegits socialistas s’abstenguèron e lo quite vice-president encargat de las finanças signalèt que refusava de prendre part al vòte. Denoncièt pas la manca de pertinéncia del projècte de LGV mas lo considèra pas finançable d’aquesta passa. Pasmens, los associatius son pas tan malcorats qu’aquò. Denise Cassou, sòcia del collectiu, relativiza quand legís los prepausses de Gilles Savary (vice-president PS del departament) dins Sud-Ouest, qu’i declara que s’opausar a la LGV en Aquitània es « criminal » (sic). « Quand òm fa de chantatge, aquò mòstra plan que lo projècte [de LGV] es en perilh, çò ditz, quand un projècte va de se e qu’a pas de problèmas per se metre en plaça, fa pas mestièr de far d’intimidacion ». Recentament, lo projècte de LGV deviá èstre a l’òrdre del jorn de la darrièra session plenièra del Conselh regional e foguèt despartat. La colèra d’Alain Rousset foguèt granda quand aprenguèt que la causa èra estada esbrudida